Të dhënat tregojnë se edhe pse Shqipëria trumbetohet si vendi i vetëm në Europë, që i shpëtoi krizës ekonomike, shqiptarët po pasurohen edhe më ngadalë se sa disa nga fqinjët e tyre që kanë pranuar zyrtarisht se ishin në krizë. 

Në vitin 2009, të ardhurat për frymë të shqiptarëve arritën në 27 për qind e Bashkimit Europian, nga 26 për qind që ishin një vit më parë. E thënë ndryshe krahasuar me mesataren e vendeve të Bashkimit Europian, pasuria e shqiptarëve është shtuar me 1 pikë përqindje. Por fqinjët tanë lindor, maqedonasit për të njëtën periudhë i kanë rritur të ardhurat e tyre ndaj BE-së, dy herë më shumë. 

Sipas EUROSTAT, të ardhurat për frymë të Maqedonisë arritën në fund të 2009 në 35 për qind të mesatares së Bashkimit Europian, nga 33 për qind që ishin në 2008-ën, edhe pse qeveria maqedonase nuk e cilësoi asnjëherë vendin e saj si fortesë ekonomike të paprekur nga kriza globale. Polonia, e cila në vitin 2009, pati një rritje ekonomike prej vetëm 1 për qind, ka mundur që ti rrisë të ardhurat e saj ndaj Bashkimit Europian me 5 pikë përqindje. Këto të dhëna, të EUROSTAT, ndonëse paraprake, tregojnë se rritja ekonomike e Shqipërisë, më tepër shërben si shifër për të bërë politikë, se sa tregues real i mirëqënies së shqiptarëve. Këta të fundit duket se do të mbeten populli më i varfër i kontinentit, edhe për shumë vite, pavarësisht  nëse shifra e rritjes ekonomike që publikon INSTAT-i është me e larta ne Europe, qofte kjo  3 apo edhe 6 për qind.